I mi amigh (fra invenziò e fantaseia)

(introduzione) “Quattro amici al bar” è una delle canzoni più famose di Gino Paoli. Il gruppo di amici ricordati dalla canzone man mano si sfalda, perchè si allontana dal bar chi ha fatto carriera o ha trovato la dolce metà. In questo scritto di Lodovico Santandrea, invece, gli amici continuano ad andare al bar, anche se qualcuno di essi ha fatto pure una notevole carriera.
Bollo, il medico, tenta di fuggire per pochi minuti dall’atmosfera cupa dell’ospedale, concedendosi un veloce caffè. Il tempo di uscire, fare 50 metri, e già dalla portineria dell’ospedale lo cercano al telefono. Ma la pausa è sacra, serve prendere un po’ di respiro: il certificato di morte da firmare può pure aspettare 15 minuti.
Cesare, invece, è autore di un proverbiale tiro mancino a un malcapitato fachiro-mangiafuoco che incautamente si esibisce al bar. Il fachiro rimane scottato al punto che per anni cerca invano di vendicarsi… e una volta che pensa di esserci riuscito, in realtà se la prende con un amico faentino di Cesare totalmente estraneo alla vicenda.
Psico, impenitente, sosta al bar da mezzogiorno a mezzanotte, giocando a carte con tutte le categorie dei clienti del bar. La malcelata disperazione del gestore del bar arriva al culmine quando, invece che alzarsi per uscire dal bar ed andare finalmente a casa, Psico si rinchiude nella cabina telefonica del bar per una buona mezz’ora: è un precursore delle telefonate erotiche!!!  (A.S.)

E DUTOR

Chissà parchè che quand e prinzipiè a fè pratica in t’e bsdel a Bollo ui tucheva semper e turen a cavai d’mezdè e acsè, prema d’e bot, e faseva e zir dal cursei par cuntrulè che quii chi steva bè in pegiurèss, che quii chi steva mel in foss drì a muri, l’andeva a tò e parmess da la sora, us caveva e grimbialò bianch e pù, pasènd in purtinereia, us aracmandeva “A vegh a tò e cafè, no stam a ropr’e cazz nench incù” e Bistecca, puntualmènt, ui arspundeva “Us scapela!”, mo regularmènt, quand cl’era impett a la cà de Pisè, e suneva e telefono in t’e bar e Sconza, che nuturiamènt un aveva stugiè a Oxford, us feva a la porta de Cumerzi e, da un cant a cl’eter d’la Piazeta d’Ravaiol, e rugeva ”Bollo al telefono”.
Tott quii ch’is vulteva i avdeva i azident che e dutòr e mandeva a che dsgraziè ch’us era sintù poch bè propi alora, ma Franco e vneva l’istess a tò e cafè, us afarmeva a sintì quater patach s’ui era un banchètt interessant e pù e turneva d’mela voja in t’e bsdel par cunstatè la mort dl’amalè per “arresto cardio-circolatorio”.

E SCARZADOR

A un girovàgo ch’us feva ciamè Mangiafuoco l’avnè la cativa idea d’avnì a esibiss a e Bar Cumerzi, quand che e Bar Cumerzi l’era e Bar Cumerzi.
L’aveva apiè una torcia e pù us feva una pcunè d’petroli e e supieva fura vapur e petroli tnend la torcia dnenz a la boca che acsè e pareva cl’alitèss de fugh.
A la fè de spetacul l’arciamè l’atenziòn d’e poblich “Siore e Siori ora assisterete a un numero unico al mondo”. Us fè una pcunè piò granda d’petroli e acsè, quand che supiè, e vens una fiama da què a là, mo in che mumènt d’ìn te fond de bar e partè e tlò de biglìerd tott agulpè zintrènd in pi la fiama tant che a e dsgraziè l’ai andè zò in gola fena a brusei nenca al budèll.
Cum’èll, cum an’èll, Mangiafuoco l’imparè che a tirei e tlò l’era stè un zert Cesare Biancinì e acsè, sicom cl’aveva una mimoria da elefant, tott al volt cl’avneva in Rumagna un mancheva d’pasè da Castèl zarchend d’Cesare Biancini, mo sicom che tott i saveva e fatt inciòn e faseva la speia.
Un dopmezdè, invezi, on ch’un saveva gnint ui insignè “Cesare Biancini è quel ragazzo in fondo alla piazza”.
Mangiafuoco alora e travarsè la piaza d’gran carira mo in te fond ui era dù zuvnott: Cesare infatti l’era drì a dscorrer cun che su amigh ed Feza, che cott in bianch che vneva da tant a Castèll senza che inciò ul avess mai sintù dscorrer, e acsè Mangiafuoco l’avdè du basterd: on grand e gross, murèll, cun una faza cl’an prumiteva gnint ed bòn, cl’eter un quèll megher, scevd, ch’un feva inciona paura.
Senza pinsei sora Mangiafuoco e ciapè pre gruvatè e piò stil di dù e pù e cminzè a sbatucièl in qua e in là, tant che e dsgraziè un aveva gnanc e fiè da dscorer, e sol dop a zencv minut e riuscè spighè che lò un era Cesare Biancini che intant, arpugnè drì a una culona d’e portigh, us la rideva d’gost.

E PRECURSOR

Sicom ch’ui tucheva semper e turen d’nott, Psico la matèna us liveva dop agli ong, e magneva e pù, vers mezdè, l’ariveva in te bar dov, par cminzè a scaldèr i moscul, e faseva un dusentzincvanta ch’us zugheva lò e cafè e l’avarseri l’aperitiv.
Dop us andeva a meter insdè in te tavlè da zencv, a e su solit post avsèn a e mur par no ave di ropacazz avsè, l’aspìteva e prem client e pù e cminzeva e stupò e man a man cl’ariveva i zugadùr, ui aramineva cun e piò elt, sicom che e liver ul tneva lò parchè clù c’segna un ha mai di svantezz.
La partida l’andeva avanti fena vers al tre quand che i piò tent i andeva a lavurè e alora Psico, par mantnì e ritmo, us miteva a fè i tarocch cun i pinsiunè: Peppino Patuelli, copa rossa, Paolino Galeati cl’aveva piò cul che anma e Pippo Contavalli che, prema d’zughè una cherta, e tucheva al tett a toti.
Vers sera e dgneva, cum che dgeva Fani, cun un fiasch d’mundèll urdinè da Badò e pù e cminzeva la rumba d’è stupò serèl tant che, vers mezanòtt, Giovanni, che ormai l’aveva pulì tott e paviment cun la sgarèna, e prinzìpieva a smignè e us miteva in pi avsèn a e tavlè cun al mà sora e mangh dla garnè e e ment apugiè sal mà.
Quand che prinzìpieva a bruntlè il trancvilizeva ch’i era quesi a la fè, mo apèna Giovanni us n’adeva che e piò elt un n’aveva gnanch cincvanta e minaceva d’purtei veia al chert, zurend e sperzurend che la sera dop un’i avrebb piò fatt zughè, e pù, rassegnè, l’andeva a apugiess a e banch.
Un bel pò dop mezanòtt e suneva e telefono e, nenca sun ng’era bsogn, us sinteva ciamè “Psico al telefono”, lò us liveva sò, e guardeva tott al chert ch’agli era stedi caledi, e cuntruleva queli d’quii ch’i era avnù zò e pù us aluntaneva racmandendes “Non stasi fè d’i rimulètt”.
Dop a un quert d’ora i zugadùr i prinzìpieva a guardè dentr a e mazz pr’avdè quanti mati ch’ui era incora da pischè, dop a vènt minut in dù o tri i s’avsineva a la cabena verda d’legn e pù i cminzeva a scusela in qua e in là che e dsgraziè cl’era indenter ui avneva, come minum, e mel d’mer e, finalmènt, dop una mezz’ora, Psico e vneva fura cun e lansìr e la faza rosa cum un tachi: l’aveva inventè e telefun erotich che, su l’avess brevetè, l’avrebb fatt i miglierd.

Da Alceo 25 Aprile 2002
(Aldvigh d’i Marièna)